Əbədiyyətə qovuşan Əsgər
Lənkəran rayonunun Ləj kəndində dünyaya göz açmış Əsgər Ələkbər oğlu Əliyev çox qısa bir ömür yaşadı. Təzəcə həyatının 21-ci baharına qədəm qoymuşdu. Ancaq bu qısa ömür yolu da olduqca şərəfli keçdi. Doğma Azərbaycanın müqəddəsliyinə tapınan Əsgər vətənin qeyrətini hər şeydən üstün tutmaqla mart hadisələri zamanı əbədiyyətə qovuşur. Göstərdiyi hünər, elinə, yurduna bağlılığı tarixə yazılır. Sağlığında əsl ər, igid idi Əsgər, ölümü ilə də bütöv Azərbaycanın iftixarı oldu.
Əsl vətənpərvər kimi boy atan Əsgər həyatı dərk edəndən gündən, niyyətini Vətənin mənafeyi naminə, ülvi məqsədlər uğrunda mübarizəyə yönəldir. 1991-ci ildə orta məktəbi bitirib hərbiçi olmaq arzusu ilə Bakı Ali Ümumqoşun Komandirlər Məktəbinin Tank-Artilleriya fakültəsinə daxil olur. Dərslərinə davamiyyəti, vətənpərvərliyi adına dərin hörmət qazandırır. Hərb elminin sirlərinə bacarıqla yiyələnir, qəlbində ona böyük bir sevgi bəsləyir. Vətənə ləyaqətlə xidmət etmək üçün gələcəkdə general olmaq haqqında düşünür.
1995-ci ilin məlum mart hadisələri Əsgərin qanını coşdurur. Kursant yoldaşları ilə bərabər silaha sarılıb müstəqil dövlətimizin müdafiəsinə qalxır. Vətənin varlığı naminə cəsur, qorxmaz döyüşçü kimi meydana atılır. Dörd kursant yoldaşını ölümün pəncəsindən xilas etsə də, özü snayper gülləsinə tuş olur. Qanı ilə vətənə sadiqliyini nümayiş etdirən Əsgər qəhrəman kimi həyatla vidalaşaraq, Azərbaycan xalqın qürur mənbəyinə çevrilir. O, Azərbaycan Respublikanın Prezidenti Ulu öndər Heydər Əliyevin 4 aprel 1995-ci il 307 saylı fərmanı ilə “ Azərbaycanın Milli Qəhrəmanı” adına layiq görülür.
Cənub bölgəsində Əsgərin xatirəsini hamı əziz tutur. Lənkəranın Qala Xiyabanı ərazisindəki mədəniyyət və istirahət parkında onun abidəsi ucaldılıb. Park həm də qəhrəmanın adını daşıyır. Oxuduğu Ləj kənd, Haftoni qəsəbə orta məktəblərində ona həsr olunmuş “ Xatirə guşəsi” yaradılıb. 8 noyabr Əsgərin doğum günüdür. Həmin gün Vətənin igid oğlu böyük məhəbbətlə xatırlanır, el-oba onu özünə şərəf, qeyrət, ucalıq zirvəsi sayır.
Zəfər ORUCOĞLU,
Azərbaycan Jurnalistlər Birliyinin üzvü
Facebook-da paylaş
