Cənub bölgələrinə dövlət qayğısı - Nura boyanan dağ kəndi
Sekəşan kəndi Astara rayonunun səfalı guşəsində yerləşir. Buranın əvəz olunmaz təbii gözəlliyi olduğu kimi varı da, bərəkəti də tükənməzdir. Kəndin hər tərəfi meşədir. Odur ki, burada bütün fəsillər heyrətamiz keçir. Yayda isə daha da cənnətləşir, xoşbəxt günləri başlanır. İnsanları təbiəti kimi saf, mehribandır. Mürəkkəb relyefə malik ərazi olduğuna görə kənd sakinləri bir sıra sosial problemlərlə üzləşməli olurlar. Artıq dövlət başçısı İlham Əliyevin xüsusi diqqət və qayğısı sayəsində sosial məsələlər öz həllini tapdıqca bu yerlərə yeni həyat gəlir.
1994-cü ildən Sekəşanın işıqları kəsilmişdi. Əhali bu səbəbdən xeyli əziyyət çəkirdi. Hətta bu qədim yaşayış məskənindən köçüb gedənlər də çox olub. Prezident cənab İlham Əliyevin sərəncami ilə ayrılan vəsait hesabına “ Azərişıq” ASC kəndə elektrik xətti çəkmişdir. İndi Sekəşan işıq selində üzür. Hədsiz sevinc içində olan camaat ölkə başçısına dərindən minnətdarlıq edir.
Şüşə kimi yol
Lənkəran rayonundakı Hirkan-Mamusta- Siyavar avtomobil yolu 7 kilometr məsafəni birləşdirir. 10 min əhalinin istifadə etdiyi bu yolun inşası uğurla başa çatmaq üzrədir. Yol müasir standartlara uyğun yenidən tikilməklə, bütün lazımi qurğu və avadanlıqlarla təmin olunub. Belə k, 4-cü texniki dərəcəyə malik yola ikiqat asfalt-beton üzlük döşənmiş, onun çiyin hissələri optimal qum-çınqıl hesabına bərkidilib. Sözün əsl mənasında şüşə kimi yoldur.
Yol əhaliyə rahatlıq gətirməklə bərabər, həm də onlara Bakı-Ələt-Astara- İranla dövlət sərhədi avtomobil magistralına rahat çıxış verir.
Rahatlıq, mədəniyyət nümunəsi olan yeni yol adamların əhval-ruhiyyəsini yüksəldib. Deyirlər ki, Prezident cənab İlham Əliyevin xüsusi diqqəti hesabına əsas problərimiz həll olundu. Hamı əl-ələ verib öz dövlətinə, ölkə başçısına böyük inamla xoşbəxt gələcək naminə qurub-yaradır.
Zəfər ORUCOĞLU,
Azərbaycan Jurnalistlər Birliyinin üzvü
Facebook-da paylaş
